Marselha ten lo ritme
 
L’Olimpic de Marselha contunha sa sèria (OM-Rennes 3-1). Amb eficacitat e soliditat, ajustèron dimenge un quatrena victòria al bilanç d’aquel començament de sason. Sens tremolar ges e malgrat un retorn de la pausa mai favorable als bretons, los provençals saupèron gardar lo pè sul balon, demorar agropats e concentrats, e trobar las oportunitats quand se presentèron. Morel, pel sieu primièr gòl jos las colors marselhesas, Gignac d’un còp de pè supèrbe dels 25 mètres, puèi Danzé contra lo sieu camp, per clavar la partida: l’OM estanca pas lo sieu començament perfièch. Dotze ponches preses dels dotze possibles, e los provençals demòran sols a la cima del classament.
 
 
Bordèu, lo mal de las finalas
 
Lo scenari es classic a l’Estadi Lescura. Dempuèi de meses, tròp de còps repetits al gost dels suportaires, solide. Qu’amb Bordèu, se pòt pas sovent èstre tranquil, quand la partida es a s’acabar. Dimenge encara, los bordaleses daissèron lampar dos ponches contra Niça, doas minutas après la fin del temps reglementari. Un pauc de desconcentracion, de fatiga après aver jogat a dètz la màger part de l’encontre, lo resultat es çò meteis; los girondins, tres jorns après las emocions fòrtas de l’Euròpa League, tornan cometre una error a la fin d’una partida que mestrejavan fins alavetz. Dins la posicion qu’i son uèi lo jorn (demòran al pè del pòdi), es pas determinant. En esperar que seràn pas de regretar mai tard, aqueles ponches. Los niçards se pòdon contentar d’aquel ponch, e plànher pasmens la nafradura de Jeremy Pied, que demorarà alonhat dels terrens per doas setmanas.
 
 
Tolosa se’n sortís justòt
 
En fàcia de Rems, tot just pojat de L2, los tolosencs joguèron amb los nèrvis del public. L’esquipa champanhòla veniá pas a Tolosa per gachar los violets: lèu-lèu los locals foguèron despassats pel vam dels adversaris. Demorèron sens capitada, pasmens, fins a la 55a minuta, qu’Abdennour marquèt contra son temps. Picats, los tolosencs capitèron ça que la una polida fin de partida. D’una mièja volada poderosa, Ben Yedder rampelèt a l’89a minuta, pel solatjament de l’Stadium. Manquèt pauc per realizar l’hold-up, quitament: un autre tir del Ben Yedder, rasís la gàbia, e un ensag de Rivière sortit pel portièr remés balhèron d’espèrs, sens capitar. Tolosa demòra al contacte dels primièrs.
 
 
Montpelhièr s’es lançat
 
Amb fòrça serenitat, Montpelhièr capitèt la siá primièra victòria dissabte. En fàcia a una esquipa de Sochaux secotida per de tensions (Ryad Boudebouz denoncièt ièr d’insultas racistas que li serián estadas fachas), l’esquipa de René Girard capitèt sens dificultat. Un penalti de Younes Belhanda, un gòl d’Emmanuel Herrera e una conclusion de Remy Cabella daissèron los jogadors dobistes sens responsa. Aital, lo MHSC prend qualques ponches que li balhan de vam e quita tanben la zòna roja pel primièr còp de la sason.
 

L2: Mónegue daissa la plaça
 
Amb una desfacha a Le Havre (2-1), l’AE Mónegue daissèt divendres sa primièra plaça. Demòran encara un ponch darrièr Dijon. Autors d’una bona partida, los monegasques poguèron pas totun far petar la soliditat del portièr havrés, un Johnny Placide en granda forma e benastruc. Pasmens la performança dels òmes de Claudo Ranieri foguèt de bona qualitat, e en jogant aital se pòt imaginar que paucas esquipas lor poiràn resistir.
 
En cò lor, l’AC Arle-Avinhon signa una bona operacion, en batre un FC Nantas que joguèt a dètz a comptar del primièr quart d’ora. David Suarez (34a minuta), que saupèt profechar d’una error de la defensa nantesa, apuèi Ben Sangare, solet en fàcia del portièr breton (54a), balhèron los tres ponches als provençals.
 
Foguèt mai complicat pel FC Istre, que tardèt fòrça per trobar la gàbia, sus un penalti de Tardieu a l’88a minuta. Sul plan dels transferiments, que tremolèt lo club provençal aquela setmana, lo jove Nicolas De Preville —se disiá que seriá la siá darrièra partida amb las colors d’Istre— n’es pas partit, encara. Lo president niçard a anonciat que vendrà pas al Gim, mas de rumors de contactes amb lo Blackpool demòran.
 
Los crocodils del Nimes Olimpic se balhèron un pauc d’aire en s’anar impausar a Laval. En Mayenne, mostrèron de bonas intencions e de determinacion, mas tanben de dificultats per realizar la darrièra passa que poiriá destabilizar l’adversari. Dominaires mas tròp pauc realistas, lor calguèt esperar la 78a minuta e un bon tir del pè esquèrre de Vincent Granic per se desliurar. Quitan la zòna roja, e pòdon ganhar fisança après una victòria seriosa.
 
Las causas se complican encara pel Clarmont Fotbòl, que es a s’esbonir completament dempuèi la fin de la sason passada. Candidats a la pojada en L1 al mes de mai, encadenan ongan las contraperformanças. Tornan de Le Mans amb una quatrena desfacha (3-1), malgrat la flaquesa defensiva dels jogadors locals, mai realistas e benlèu mai determinats.
 
 
 

Liga 1
	Esquipa	Pts	J	G	R	P	Bp	Bc	Dif
1	Olimpic de Marselha	12	4	4	0	0	7	1	6
2	Olimpic de Lion	10	4	3	1	0	9	4	5
3	FC Lorient	8	4	2	2	0	9	5	4
4	FC Girondins de Bordèu	8	4	2	2	0	5	3	2
5	Tolosa FC	8	4	2	2	0	5	3	2
6	Valencianas FC	7	4	2	1	1	6	3	3
7	AS Sant Estève	6	4	2	0	2	9	4	5
8	París SG	6	4	1	3	0	4	3	1
9	SC Bastia	6	4	2	0	2	7	9	-2
10	Estadi Brèst 29	6	4	2	0	2	3	6	-3
11	Lilla OSC	5	4	1	2	1	6	6	0
12	AC Ajaccio	7	4	2	1	1	3	3	0
13	CE Montpelhièr d’Erau	4	4	1	1	2	5	5	0
14	Estadi Rems	4	4	1	1	2	3	4	-1
15	AS Nancí Lorena	4	4	1	1	2	2	5	-3
16	OGC Niça	3	4	0	3	1	3	4	-1
17	Estadi Rennes	3	4	1	0	3	4	7	-3
18	Evian-Thonon-Gaillard	1	4	0	1	3	3	7	-4
19	ES Tròias AC	1	4	0	1	3	4	9	-5
20	FC Sochaux Montbéliard	0	4	0	1	3	4	9	-5